Juan Suldado stubo binte-i-quatro anhos a serbir al Rei. Todo quanto ganhou fúrun quatro pães i quatro binténs. Tudo isso dou als pobres. I adepuis nun le deixórun sequiera antrar nien no cielo nien no einfierno. Porque el andubo na tropa i quando bieno de la tropa traie ls quatro panes i ls quatro bintenes, no camino saliu-le un pobre. I diç assi:

— Dá-me ua smola.

I diç-le el assi:

— Toma!Toma lá! Toma un pan. Stube a serbir binte i quatro anos o rei, tudo quanto ganhei foram quatro binténs ... quatro bintenes i quatro panes. Toma un.

Mais alantre, mais alantre, mais alantre, apareciu-le outra beç l mesmo pobre. Era Nosso-Senhor. I diç-le assi:

— Dá-me ua smola.

I diç el:

— Inda alhi atrás dei outra! I anton agora eiqui parece-me l mesmo pobre! Que carai quanto pobre hai eigual! diç para San-Pedro.

Pronto dou-le outro pan.

Mais alantre tornou-le a salir. Diç:

— Nunca bi tanto pobre, armanos, dezie el.

Dou-le outro pan. Até que le dou ls quatro panes, quedou cun ls bintenes. An ne fin, Nosso Senhor anquanto nun le sacou ls quatro bintenes nun parou. Saliu outras quatro bezes, el i San-Pedro. I diç:

— Dá-me outra smola! Dá-me ua smola!

— Toma! Tudo quanto ganhei — diç— ganhei binte i quatro — sempre dezia a mesma — ganhei quatro pães i quatro bintenes, toma alhá un. Carai, que si que me apareces al que dei la smola inda agora! — dezie el.

Tornaba alantre até que le acabou cun ls bintenes i ls panes. Pronto, dou todo. I apuis tornou-le a salir i diç-le assi:

— Dá-me ua smola!

I diç assi el:

— Stube binte i quatro anhos a serbir al rei, tudo quanto ganhei dei als pobres, quatro bintenes i quatro panes, todo esso dei als pobres, agora nun tengo nada que dar.

I diç-le assi San-Pedro por trás:

— Pide la salbaçon. Juan, pide la salbaçon!

— You para que quiero esso para nada, diç el.

I bai anton, pronto, diç assi el, diç:

— Anton, se me dás l que you quiero, quiero que todo l que you beia cun ls mius uolhos que salte todo pa l miu bornal.

Nosso Senhor tubo que se lo dar. Dou-le anton aquel poder.

Un die passou por ua feira, biu chouriços assi you sei alhá, montes de cousas i el diç assi, tenie fame, i diç assi, diç:

— Ó chouriços de la mie alma binde todos i correi todos i saltai todos pa l miu bornal.

Ls chouriços ancomeçórun a saltar, a saltar, a saltar, a saltar i l home de la feira a apanhá-los, a apanhá-los, mas saltórun todos para el i apanhou-los el todos. Pa ls comer...

Buono, l home apuis quedou pobre.

Quedando pobre apareciu, you sei alhá, an Sendin ou an Picuote i pedindo ua pousada a ber se arranjaba alhi ua casa para morar i assi. L home cheno de fame, pobre sien denheiro i anton alhá diç assi un, diç:

— Ah, eiqui hai ua casa mui buona i ten alhá muito que comer, mas hai alhá un miedo, ten alhá muito bino que buber, stan las cubas chenas i ten muito chouriço i muito presunto. Mas naide alhá bai, ende por meia-nuite ben un miedo i nun deixa parar alhá naide.

I el diç assi, diç:

— You nun tengo miedo a naide! Diç: Stube binte-i-quatro anhos a serbir al rei, todo esso dei als pobres, para quanto you mais agora tener miedo i you nua casa dessas que haba que comer.

Sentou-se na cozina, comiu daqueilhes chouriços, fartou-se daquel bino, puso-se meio catumba. Quando, nesto, pul meio de la nuite alhá te ben l miedo. Começa anton ua alma de l outro mundo:

— You caio!

I anton meio antanrangando-se i el:

— Cai-te que te liebe l diabo, que you a aparar-se nun bou, dezie-le el.

Tornaba deili a outro rato:

— You caio!

— Cai-te que te liebe l diabo, mas you a aparar-se nun bou! Mas you como i bebo, mas ls mius cabelos arrepiában-se, dezie el. Come i bebes, daba un beiso na cántara, mas os meus cabelos arrepiában-se. L home staba antressudado i mais staba antre-Pinto-i-Bal-de-Moro i bai anton diç assi, diç:

— Cai-te que te lebe o diabo, pula chaminé abaixo. Quando al fin diç assi, diç:

— Cumo caio? Bou cair un braço primeiro i adepuis ua pierna.

— Nó, nó, nó, nun andes cun isso! Cai todo junto.

Diç:

— You cá como i bebo, mas dou un beiso na cántara, mas ls mius pelos arrepiában-se, dezie el.

Caiu, caiu anton la fantasma, la fantasma que nun tenie luç la casa, nun tenie nada, mas cun ls uolhos de la fantasma eiluminaba la casa toda. Bon, eiluminando la casa toda, l home alhá le dixo la stória de l denheiro que habie ganhado i esso... l que tenie ganhado tenie dado todo als pobres, i diç el assi, diç:

— Olha Juan, a ber se me puodes salbar, que you nien entro no cielo nien no einfierno. Eiqui neste sítio hai uas barras de ouro nuas panelas i alhi hai outras de prata, daquel lado hai outras de cobre. I yá bés que quedas rico. Ye para dar als pobres mas inda queda muito para ti, para you poder antrar ne cielo, dixo la fantasma.

Diç-le el assi, meio caendo-se; meio antarangando-se diç-le assi, diç:

— Olha you que stube binte-i-quatro anhos a serbir al rei, todo esso dei als pobres l que you nun farei por ti, por esse denheiro todo!

Pronto, fui l home, diç-le la fantasma, diç:

— Pega nun picarete i scaba eiqui.

Diç:

— You scabar! Scaba tu.

Tubo que scabar la fantasman. A sacar las panelas que tenien l denheiro.

Diç:

La fantasma cun aquel suor i aquel sumblante, corrie-le l suor al para baixo a scabar que alhá le salírun uas panelas de ouro i apuis outras de prata i outras de cobre. I diç-le assi el assi, diç:

— Olha, Juan, estas de prata dás-las por missas... las de cobre dá-las de missas para mi i las de prata dás... debides todos als pobres... todo esto als pobres i l outro mandas-me dezir missas para mi l que dir de las missas mandas-me-las dezir i l ouro queda todo para ti. Diç: Tu serás que me dirás estas missas?

Diç:

— Olha you stube a serbir al rei para ganhar binte-i-quatro panes i quatro binténs, quanto you nun farei por ti por esse denheiro todo?

Pronto, alhá se fui la pantasma, diç:

— Bai-te i tirate-me de lantre que you nien te puodo ber na mie frente.

La pantasma fui-se i l home quedou anton eili el solo outra beç a passar la borracheira. Pu la manhana bieno — dou todo aquel denheiro als pobres — i lougo fui a falar cun l cura para mandar dezir las missas que el habie dito (l que habie mandado debedir aquel denheiro i l outro para el).

Buono, anton alhá l home fiç esso. Quando al fin l home inda bibiu, inda bibiu apuis cun aquel denheiro. Adepuis morriu. Morrendo, fui a bater al cielo. Nun le abrírun la puorta. Staba alhá San-Pedro cun las chabes i lougo le dixo:

— Eiqui nun tenes antrada Juan. You nun te dixe que pedisses la salbaçon?!

I diç assi, diç:

— Ah si! Stá bien.

Nesto agarra cul i bai a la casa de l diabo. L diabo, habie agarrado ua beç un diabo nua fieira i maçucou-lo, deixou-lo de todo, mandou-lo saltar pa l bornal, an saltando pa l bornal aí maçucou-lo cumo debie de ser, l diabo. Quando al fin, assomórun-se i diç:

— Quien ye?

Diç:

— Ye, ye... Juan-Suldado.

Tenie un quarteiron — bós sabiedes l que era un quarteiron, daqueilhes postiicos. Táque, lougo le fechou, un pequeinho.

Diç:

— Ye Juan Suldado! Fechai las puortas todos!

Tenien muito miedo! Ala, fechórun las puortas todas, nun le deixórun antrar. Tornou-se al cielo. No Purcatório tamien nun le quejírun. Chegou-se al cielo i diç-le assi San-Pedro. Diç:

— Á Juan, tu yá sabes que nun tenes antrada eiqui home! Tu nun pediste la salbaçon, cumo quieres tu antrar?!

Diç:

— Ah, nun tengo antrada ende, anton entra pa l miu bornal.

Dou ua maçucatela buona a San-Pedro. Al fin tenie un chapéu i diç assi, diç:

— Onde l miu chapéu parar, alhi you me hei-de assentar.

Atirou cun l chapéu pa dentro de la preça-de-casa de l cielo, alhi parou l chapéu i el sentou-se an riba. San-Pedro yá nun le fizo mais nada porque senó maçucába-lo.

Apuis acabou eiqui la cunta.

La cunta de JUAN SULDADO ye ua narratiba mui conhecida an todo l mundo. La narradora de la berson eiqui reproduzida ambrulha eilementos (ou temas) de bárias cuntas. Assi i todo essa mistura nun quebra la ounidade de la cunta. La narrativa zambulbe-se a partir de ls seguintes eilementos:

A — Un suldado andou binte i quatro anhos a serbir l rei, ganhando quatro panes i quatro bintenes. Ancóntran-se nun camino cun dous pobres, que son Jasus i San Pedro, que le sálen quatro bezes i a quien dá todo l que ten;

B — Recibe de Jasus un bornal onde entra todo aquilho que el quier;

C — Queda pobre i pon-se a pedir;

D — Ancontra ua casa onde hai muito que comer mas sale alhá un fantasma;

E — Entra nessa casa onde come i bebe i queda de nuobo rico;

F — Apuis de morrer nun le deixan antar an ne cielo nien no einfierno;

G — Fai cun que San Pedro salte pa l sou bornal i el entra assi an ne cielo.

L eilemento comun a todas las bariantes desta cunta ye l oubjeto mágico — l bornal — que l heirói recibe i cun l qual se burla de l diabo ou de la muorte. Nesta cunta, l bornal mágico sirbe para anchir de chouriços, para dar uas maçucadelas buonas al diabo i tamien para antrar an ne cielo, anganhando a San Pedro. Assi i todo, l narrador nun diç que Juan Suldado recebiu l "bornal", mas apenas l "poder" que le ye dado pul olhar.

L númaro binte i quatro, que son ls anhos passados por Juan Suldado a serbir l rei, stá carregado de simbologie. Segundo Jean Chevalier, el andica la dupla harmonie de l cielo i de la tierra (12x2), mas tamien la duplicidade de l camino terrestre até la eiternidade. Neste sentido, ls 24 anhos passados a serbir l rei son l’eimaige de la bida terrena na sue caminada para outra dimenson.

I yá que falamos an númaros nun podemos çquecer l quatro: quatro panes i quatro bintenes fui todo l que ganhou Juan Suldado. Tamien eiqui, stamos delantre de la simbologie de l todo, mas un todo "tangible, palpable" i quaije material. Assi sendo, nada mais natural que Juan Suldado se çfaga de todo l que ganhou, dando-lo als pobres. Naturalmente que este ye tamien un símbolo de la criaçon — ls quatro cantos de l Mundo — i al mesmo tiempo de la totalidade de todo l que nun ye eiterno.

L diabo anganhado quando se ancuntraba nua figueira, ye outro de l eipisódios comuns a la cunta de Juan Suldado. La figueira ye, tal cumo la binha i la oulibeira, ua de las árboles de ciéncia i de la fartura. Mas ten tamien un lhado negatibo, tornando-se símbolo de l Mal, de l’árbole que seca i nun dá fruito. Nun ye pois por acauso que l diabo stá an riba desta árbole, acusando la dualidade que ye, afinal, la eisséncia de l próprio personaige.

La stória ou l eipisódio de l fantasma puode ancontrar-se, eisoladamente, noutra cunta conhecida por Juan sien miedo ou L rapaç ou moço que nun sabie l que era miedo, de la qual eijísten bersones an praticamente todo l mundo. L narrador outeliza siempre l femenino i, a las bezes, amprega tamien la forma pantasma. Esta bariante, denuncia, an nuosso antender, la ourígen scrita de la cunta, deribada de pronúncia bulgar de la grafie phantasma. La forma femenina ye comun quando significa pessona çfarçada que sale de nuite para assustar la giente.

La maneira cumo Juan Suldado cunsigue antrar an ne cielo, assi cumo ls outros eipisódios an que l protagonista fai caçoada de San Pedro i de l diabo, ten tamien muitas bariantes an toda la tradiçon ouropeia. An alguas cuntas l heiroi bai al einfierno i ganha todas las almas que alhá stan, jogando a las cartas cun l diabo. Noutras, entra an ne cielo apuis de çcutir cun San Pedro, botando-le a la cara l sou pecado de haber negado trés bezes a Jasus.

Antonho Bárbelo Albes

Nice, 22 de Márcio de 2002

Er’ua beç un lhobo, ancuntrou ua cochina, que tenie ua cochinica, I chegou l lhobo a la borda d’eilhas I dixo que ls querie comer, I la cochina dixo-le que nó, q’aguardara mais uns dies.

_ Puis bien, cá benerei.

Fui par’ un arador I dixo-le q’habie de comé-las bacas. Depois dixo l’arador:

_ Nó, q’inda stan mui fracas. Deixaremos-las mais uns dies.

Apuis fui par’ ua baca que staba nun cerrado angurdar.

_ Ah! baca, que t’hei-de comer!

_ Agora nun me comas; deixa-m’mais uns dies, q’agora stou mui fraca.

Dalhi a uito dies fui’ lhobo a comé-la baca I dixo-l lhobo:

_ Agora bou-t’a comer!

_ Puis come, come!

Depuis prendiu l lhobo ua cuorda a la baca, I dixo-l la bac’ à’ lhobo:

_ Mete la cuorda ne cachaço; z-agora queres que t’ansine cuma fáian las bacas ne berano, quando dá la mosca?

_ Ansinai, ansinai. Tod’ ye bien saber.

I puis saltou la bac’a fugir cu’ lhobo a la rastra. Apuis cobrou-se la cuorda I fui’ lhobo pa la rapoza, I dixo-le:

_ Si, si, comadrica,

se la cuorda [nun] quebra

I l nolo nun zata

you iba parar a casa

de l donho de la baca.

In J. Leite de Vasconcelos, Contos populares e lendas, coord. de A.S. Soromenho i P. C. Soromenho, Coimbra, 1963, bolume I, nr. 33, p. 20. Recolhido an Dues Eigreijas an 1884. Ourtografie atual.

Fui ua beç I meti los cordeiros no palheiro, apuis fui la raposa antrou pul telhado pula manhana, chiguei alhá I bi los cordeiros muortos e adepuis dei la buolta al redor de l palheiro, achei la raposa muorta, agarrei-la pul rabo, butei-la pa la rue cuidando que staba muorta. Adepuis querie-le sacá-los uolhos, tenie-la presa cua cuorda, fui a pegá-la pula punta pa la libar a la rastra, salt’a fugir, que ningun perro l’agarraba."

In J. Leite de Vasconcelos, Contos populares e lendas, coord. de A.S. Soromenho i P. C. Soromenho, Coimbra, 1963, volume I, nr. 21, p. 29. Recolhido em Sendim antes de 1886. Ortografia actual, mantendo algumas caraterísticas apontadas por J.L.V: artigo los, ausência de lh- inicial (libar), i em sílaba pré-tónica (chiguei, libar), ningun em vez de niun, no em vez de an l ou ne l.

"La bicha" - "La lhoba parda"

No início de 2002 foi publicado neste sítio um breve ensaio sobre um dos mais interessantes romances que se encontram em Terras de Miranda, la "Lhoba parda". Em 20.2.2002 foi apresentada uma nova versão, revista e ilustrada com música. Porém este é um texto que está ainda a ser construído. Novas informações, recolhidas em Miranda ou lidas em bibliografia espanhola exigem uma nova reformulação. Enquanto ela não for feita, aqui ficam apenas o próprio romance e algumas melodias que, directa ou indirectamente, lhe andam associadas. A novidade, agora, é apenas uma versão do romance cantada por uma mulher de Malhadas.

La lhoba parda

Vamos ouvir "La Bicha" , tal como nos é oferecida por Wenceslao Martínez Calonge, em http://www.interacesso.pt/wencesmc.miranda1.html, e leiamos o romance que a acompanha na pauta de Serrano Baptista (p. 74):

Indo you mie sierr' arriba ....delantre de mi' ganado

Repicando a miu caldeiro ....remendando ne miu samarro

I me saliu ua lhoba ....mais grande q' ua bitela

Me tirou ua cordeira ....filha dua oubeilha branca

Nieta dua oubeilha negra ....filha de l melhor maron

q' en la sierra se passeia.

- Deixa la cordeira, lhoba, ....mira que te sal cara!

- Que dizes tu pastor ....an drento de tu samarra

Se pa ti i pa tous perros ....ua mano m' achegaba.

- Abaixo siete cachorros ....arriba perra Guadiana

Que si matardes la lhoba ....tenereis la cena ganha

Siete caldeiros de lheite ....i outros siete de talhada

Mas si no me la matardes ....apanhais caiatada

Andibérun siete lheugas ....todas siete por arada

I al fin de siete lheugas ....ya la lhoba iba cansada

- Chama ls perros pastor ....q' you nun buolbo a tu' malhada

Que perros cumo los tous ....No los hai an Portual

Ouçamos agora La Bicha" de Malhadas , na versão oferecida por Wenceslao Martínez Calonge.